Современата теорија на преводот интензивно се развива, разработува нови методи и теоретски стратегии, навлегува во нови области на научното знаење. Една од таквите области е културологијата, која во широка смисла може да се дефинира како теорија и историја на културата, како општотеориска дисциплина, што ја проучува културата како форма и начин на егзистирање на човекот. За создавање на емпиричката база и за споредбено типолошко изучување на културните појави, културологијата ги проучува обичаите, светогледот, традициите, естетските вкусови и стереотипите на соодветна етничка заедница.